Тайландаас Хонконгийн чиглэлд нисч явсан СХ712  онгоцыг Филиппиний алан хядагч уржигдар барьцаалж унагах оролдлого хийжээ. Уг онгоцоор  зорчиж явсан З.Буяннэмэх хэмээх Монголын бизнесмэн залуу  алан хядагчтай тэмцэлдэн онгоц унагаах ажиллагааг нь зогсоож зорчигчдын амийг аварсан байна.

Филиппиний алан хядагч, амиа золиослогч этгээд цагдаагийнханд өгсөн мэдүүлэгтээ Хонконгийн “Cathay Pacific” авиа компанийн СХ712 чиглэлийн онгоцыг унагах үүрэг авсан гэдгээ хүлээн зөвшөөрсөн байна. Ийм үүрэг авсан алан хядагч онгоцонд ганцаараа суусан бөгөөд зорчигчдыг суудлаас босголгүй хутга тулган айлган сүрдүүлж онгоцны хаалгыг нээж унагах ёстой байж.
Гэвч түүний энэ ажиллагааг Монголын иргэн З.Буяннэмэх гэдэг  залуу  тасалдуулж 216 зорчигчийн амийг аварсан байна.Энэ монгол залуу өчигдөр эх орондоо газардсан. Өнөөдөр Ерөнхий сайд С.Батболд хүлээн авч уулзан түүний эр зоригийг үнэлж, бахархаж байгаагаа илэрхийлэн  талархалын бичиг гардууллаа. Түүнийг Ерөнхий сайдын уулзалтын танхимаас гарч ирэхэд нь ярилцсан юм.

-Эр зориг гарган олон зуун хүний амь аварсанд баяр хүргэе. Ерөнхий сайд тантай уулзан талархал гардууллаа. Сэтгэгдэл ямар байна?