2050 он гэхэд Европын тал хувь усанд автана

БРЮССЕЛЬ. /Voice of Russia/.  Энэ зууны дунд үе гэхэд Европ тивийн тал нь усанд автана гэж Уур амьсгалын өөрчлөлтийг судалдаг олон улсын шинжээчдийн бүлгийн дэд ерөнхийлөгч, Брюсселийн нэг их сургуулийн профессор Жан Паскаль ван Иперселе мэдэгдлээ.

Их Британийг дайрч буй их үер бол зөвхөн анхааруулга төдий зүйл гэж тэрбээр хэлэв.
Түүний үзэж буйгаар, байгалийн гамшгууд нь далайн түвшин дээшилснээс бус, харин  дэлхийн болон хойд туйлын мөс хайлж буйтай холбоотой дэлхийн уур амьсгалын өөрчлөлтийн улмаас үүдэн хур тунадас ихээр унах болсонтой хамааралтай аж.
"Мөс хайлснаар дэлхийн далайн температурт нөлөөлж, улмаар агаарын урсгалын одоогийн системд саад учруулж байна" гэж профессор хэллээ. Агаар мандал дахь усны уурын бөөгнөрлийн улмаас асар их хур тунадас унадаг байна.

Ирэх 30 жилд Европт үер усны аюул байнга нүүрлэх бөгөөд 2050 он гэхэд энэ байдал улам дордоно гэсэн урьдчилсан таамаглалыг  Жан Паскаль ван Иперселе дэвшүүлсэн юм.
Дэлхийн далайн түвшний өсөлт нь ялангуяа Копенгаген, Лондон, Амстердам, Антверпен болон Роттердамд үер усны аюулыг илүү учруулж байна.

Г.Доржханд