 -ВХ-ээр сонин сайхан юу байна вэ? Шинэ цомог гаргасан гэж сонссон.
-Тийм ээ, би баяртай байна. Өнгөрсөн онд туурвисан уран бүтээлээ нэгтгээд "I have a dream" нэртэй шинэ цомгоо гаргалаа. Хүн болгон мөрөөддөг шүү дээ. Миний хүсэл, мөрөөдөл дуунуудад маань шингэсэн. Би зөвхөн хайр дуулахыг хүссэнгүй. Тэр дундаа өнөөгийн нийгэмд өрнөж буй далд асуудал, хүний эрх чөлөө, боогдмол байдлыг залуусынхаа өмнөөс зоригтой дуугаръя, хэлье гэж бодсон.
-ВХ-ийн хүсэл мөрөөдлийн нэгээхэн хэсгийг цомгоос нь мэдэрч болох нь нь ээ.
-Залуус юу сонсож, хэрхэн дурлаж, клубт ороод яаж бүжиглэдэг болсныг мэдэж болно.
-Сүүлийн үед стиль имижээ өөрчлөөд байна уу даа?
-Тийм ээ. Дуулж байгаа дуу, хэлж байгаа үг, яриа, өгүүлж буй өгүүлэмж, бүжиглэж буй бүжгээсээ шалтгаалаад стиль имиж маань өөрчлөгдсөн. Би үзэл бодлоо чөлөөтэй илэрхийлж, эрх чөлөө, сайн сайхан өөдрөг зүйл рүү тэмүүлэхийг хүсдэг. Залуу хүнд өөрчлөлт хэрэгтэй.
-Дуунууд тань өмнөхөөсөө цоглог өнгө аястай болсон байна?
-Тийм ээ. Хип хоп, уянгын аялгуутай хосолсон. Орчин үеийн амьдралын хэв маяг хурдтай, завгүй болсон. Өглөө гараад орой харанхуйтай уралдаж гэртээ орж ирж байна. Нэг үгээр хэлбэл цаг хугацаатай өрсөлдөж, уралдаж амьдарч байна шүү дээ. Хайр ч мөн адил. Ялангуяа барууны оронд энэ бүхэн уран бүтээлд нь мэдрэгддэг. Тухайлбал, Нью-Йорк бусад хотоосоо харьцангуй хурдан тэмүүлэлтэй дуутай. Тэгвэл арай алслагдмал хотод хөгжим нь хүртэл удаан тэмптэй байх жишээтэй. Хотжилт, амьдарч буй орчноосоо шалтгаалаад уран бүтээлийн өнгө аяс хүртэл өөр өөр байна. Өнөөдөр Монголд шинэ нийгэм, шинэ уур амьсгал бий болж байна. Үүнийгээ дагаад залуу үеийнхээ уран бүтээлч, дуучдын төлөөлөл болж байгаагийн хувьд уран бүтээлдээ шингээхийг зорилоо.
-Анх гарч ирж байсан үеэ бодвол урлагт одоо өөрийн гэсэн байр суурьтай болж чадсан байна шүү.
-Хичээж зүтгэвэл бодож байсан бүх зүйлийнхээ ард гарч чаддаг юм байна. Зорьсон зүйлдээ үнэнч сэтгэлээр хандаж, зөв амьдарч, ажиллавал хувь тавилан хүнийг шагнадаг юм шиг санагддаг. Зорилго, хүсэл мөрөөдөлдөө үнэнч байх хэрэгтэй. Дараагийн үр дүн нь сайн сайхан байна гэдэгт би үргэлж итгэдэг. Анх бие дааж уран бүтээл туурвиж байхад надад хэцүү асуудал их байсан. Өөр дээр минь бүх зүйл ирэхэд шийдэж, төлөвлөхөд мэдээж амар байгаагүй. Одоо эргээд харахад зовлон бэрхшээл гэж бодож байсан бүхэн ард минь хоцорсон, би тэр бүхнийг ялж чадсан байна. Залуус аа, өөртөө итгэлтэй байх хэрэгтэй. Өөрийнхөө зөв гэсэн зүйлд тууштай байгаарай. Мөрөөдөл биелдэг юм шүү.
-Зурагтаар гарч байхыг чинь хараад ихэмсэг, бардам залуу байна гэж боддог байлаа. Ярилцаад суухад харин ч бодож байснаас маань өөр хүн байна .
-Би хүмүүстэй аль болох нээлттэй байхыг хүсдэг. Нээлттэй байна гэдэг том боломж.
-Залуус хайр дурлалд хэрхэн ханддаг нь өөрт тань ажиглагдаж байна уу?
-Хайр, дурлал үе үеэрээ өөр өөр байдаг шүү дээ. 1960-1980-аад оны үед залуус захидал бичиж, эсвэл орцонд уулзах гэх мэтээр хайр дурлалын асуудалд ичимхий бүрэгдүү байдлаар ханддаг байсан. Тэгвэл өнөөгийн залуус онлайн, мессэж бичиж, мессэнжерээр чаталж хайр сэтгэлээ чөлөөтэй илэрхийлж байна. Хүмүүс бие биетэйгээ учрахдаа эрт, хожуу дурладаг тохиолдол зөндөө л байдаг. Дурлалаа би дуундаа шингээсэн.
-Хайр, дурлалаас өөр үү?
-Дурласан хүн эхлээд ямар нэгэн байдлаар татагддаг. Дараа нь танилцаад танихын тулд нөхөрлөж, хамт байж үздэг. Зан чанарыг нь танихаараа хайртай болдог. Хайр бол насан туршийнх байдгаараа агуу зүйл. Харин дурлалд болгоомжтой хандах хэрэгтэй.
-Таныг гал халуун хайртайгаа учирсан гэж ойлгож болох уу?
-Тийм ээ. Хайртайгаа учирсан. Би одоо найз бүсгүйтэйгээ хамт амьдарч байгаа. 25 бол ид хийж бүтээх нас. Амьдрал зохиоход тийм ч эртдэх нас биш. Надад хойшдоо төлөвлөж, бодсон зүйл их бий. Тийм болохоор ажил, амьдрал хоёрыг зэрэг авч явна.
-Зарим залуус 28, 30 насандаа тэгнэ, ингэнэ гээд төдөвлөчихсөн байдаг юм билээ. Та гурван жилийн яана гэж төлөвлөсөн бэ?
-Гурван жилийн дараа амьдрал маань цэцэглэсэн байна. "Эрт гэрлэвэл эрт хождог" хэмээх эртний үг бий. Хүнийг эрт таньж, хамт амьдарна гэдэг цаг хугацааны асуудал. Хүмүүс амьдралаа янз бүрээр л төлөвлөсөн байдаг юм билээ. Миний хувьд гэр бүл, үр хүүхэдтэй болж, бие дааж амьдрах хэмжээнд хэдийнэ хүрсэн.
-Амьдрал ганц үг хэрнээ цаагуураа олон утгыг агуулж байдаг юм шигээ.
-Магадгүй ээ. Хорвоод хүн ганц л төрж, нэг л удаа амьдардаг. Хүн өөрийнхөө амьдралыг гартаа атгаж төрсөн бол түүгээрээ амьдрах хэрэгтэй. Би өөрийнхөө түүх, үзэл бодол, дотоод ертөнц хайр, дурлал, амьдралаа дуугаараа илэрхийлнэ. Надад амьдрал алдаж болохгүй агшин мэт санагддаг. Цaг хyгaцaa ч гэсэн үнэтэй. Эргэж олдохгүй тул хайрлаж, хүндэлж, бодож санасан зүйлээ амжуулж амьдрах хэрэгтэй. ВХ гэж хэн бэ, дотоод ертөнцөөр минь аялмаар санагдвал, амьдралыг минь мэдэхийг хүсвэл миний цомгийг сонсоорой. Тэр цагт намайг төвөггүй таньж болно.
-Дэвэргэн, романтик сэтгэлгээтэй залуу яруу найраг сонирхдог уу?
-Би дууныхаа шүлгийг өөрөө зохиодог. "My love", "Sorrow" дуугаа тухайн үед төрж байсан мэдрэмжээрээ л бичсэн.
-Хайр дотроо олон янз байдаг юм шиг санагддаг. Найз бүсгүйдээ анхны харцаар дурласан уу, эсвэл дасаж дурласан уу?
-Залуус хэрхэн бие биетэйгээ учирч дурладаг вэ, түүн шиг л бид дурласан. Эхлээд харцаараа дурласан, дараа нь ухаалаг занд нь татагдсан. Зан араншинг нь таних тусмаа хайрласан. Одоо хамт байх тусмаа бүр дотносож, улам хайрлаж байгаа. Би амьдралынхаа ханийг зөв сонгосон гэж боддог. Одоогоор надад сэтгэл зовниж, шаналах зүйл мэдрэгдээгүй. Тийм болохоор сонголтоо зөв хийж чадсан гэдэгтээ итгэлтэй байна.
-Найзууд чинь, гэрийнхэн тань таныг ВХ гэж дууддаг уу?
-Намайг Баагий гэж дууддаг. ВХ нэр миний имиж.
-Таны дараагийн алхам?
-Би гурав дахь цомгийнхоо ажилд шаргуу орчихсон байгаа. Хойшдоо уран бүтээл маань зогсолтгүй үргэлжилнэ. Удахгүй "Алдаа" дууны минь клип цацагдана. Мөн "Дөрвөн улирал", "Эргэлзээ" дуугаа дүрсжүүлнэ. Ирэх намраас өөрийнхөө шинэ уран бүтээлээр бие даасан тоглолт хийхээр төлөвлөсөн. Quiza, Т.Эгшиглэн, Э.Агиймаа нартай хамтарч энэ зуны турш эгшиглэх уран бүтээл туурвиж байгаа. ВХ амрахаа хойш тавьж, зогсолтгүй хөдөлмөрлөнө. Ямар бүтээл хийсэн маань та бүхэнд удахгүй дуулдана аа.
-Танд баярлалаа.
| АНУВашингтон ДС, Нью Йорк, Чикаго, Денвeр, Сан Франциско, Лос Анжелос, Сиатл, Техас, Бусад, Канад |
АЗИМонгол, Япон, Хятад, Солонгос, Сингапур, Хонг Конг, Австрали & NZ |
ЕВРОПИх Британи, Ирланд, Бельги, Герман, Чех, Норвеги,Франц, Турк, Польш, Орос, Швед |
|
Электрон бараа