 Морганыхан бол орчин үеийн Нью-Йорк хотын Манхеттен дүүргийн байдаг л нэг гэр бүл. Тэд баян, амжилтад хүрсэн, ихэмсэг, том хотын тансаг амьдралд толгой нь эргэсэн, дээр нь бас салахын даваан дээр байгаа хос. Гэтэл огт санамсаргүй байдлаар тэд нэгэн аллагын гэрч болдог. Үүнээс болж тэд гэрчүүдийг хамгаалах хөтөлбөрт хамрагдан, хөдөөний нэгэн багахан хотод амьдрах хэрэгтэй болно. Тэнд амьдрах болсноор хотын тансаг байдлаа алдсан ч дахин бие биенээ олж авдаг. Энэ бол Холливудын од Сара Жессика Паркер болон Хью Грант нарын гол дүрд нь тоглосон “Морганы гэр бүл” кино юм. Энэ кино саяхан ОХУ-д нээлтээ хийсэн бөгөөд “Труд” сонины сурвалжлагч Сара Жессика Паркераас ярилцлага авсныг толилуулж байна.
-Та Хью Гранттай харилцаа холбоо нь юу юугүй нуран унах гэж байгаа гэр бүлийн хосод тогложээ?
-Тийм ээ, бидний тоглосон баатрууд 10 жил аз жаргалтай амьдарсан. Ямар ч байсан миний тоглосон Мэрил ингэж боддог юм. Гэвч нөхөр нь түүнийг араар нь тавьсныг мэдмэгц хосууд хөндийрч эхэлдэг. Гэхдээ Пол (Хью) эхнэрээ хуурсандаа маш их харамсч, түүнд дахин нэг боломж олгохыг хүснэ. Эхнэр нь маш их гомдсон ч түүнтэй үдшийн зоог барингаа ярилцахыг зөвшөөрдөг. Гэтэл дараа нь санамсаргүй үйл явдал тохиолдоно. Тэд нэгэнт учир нь олдохгүй болсон гэмт хэрэгтэй холбоотой аллагын гэрч болдог. Энэ л киноны гол зангилаа байгаа юм. Хью Грант бид хоёрыг буйдхан газрын нэгэн жижигхэн хотод гэрчүүдийг хамгаалах хөтөлбөрийн дагуу илгээснээр хамгийн сонирхолтой зүйл эхлэх болно.
-Та нар Вайоминги мужид том эдлэн газартай Харрисон Фордынхоор зочилсон уу?
-Үгүй ээ, орж чадаагүй. Зураг авалт Нью-Мексик дэх Рой гэдэг жижигхэн хотод болсон. Тэнд ямар ч зочид буудал, ер нь хоног төөрүүлчих аятайхан байр сав зүйл байхгүй байсан болохоор бид сургуулийн хашаанд явуулын чингэлэгт байрлаж байлаа. Энэ газрыг “Ройгийн зуслан” гэж нэрлэдэг гэсэн. Бид сургуулийн шүршүүрт усанд орж, цайн газарт нь хоолонд орж байв.
-Тэгэхлээр та нар яг л киноныхоо баатрууд шиг Манхеттений тансаг байдлаас бараг л хүй нэгдлийн үед очсон юм байна. Яаж тэсч байв аа?
-Энэ кинонд нэг инээдэмтэй үзэгдэл байгаа. Миний баатраас “Та үхэх, эсвэл Нью-Йоркоос явах хоёрын алийг нь сонгох вэ” гэж асуудаг. Хариуд нь тэр “Хэдэн минут бодоод үзье” гэдэг юм. Тэр зүгээр л Манхеттенээс өөр газар амьдарч болно гэдгийг төсөөлж ч чадахгүй л байхгүй юу. Харин би Огайо мужийн Нелсонвилл гэдэг жижигхэн хотод төрж, өссөн. Тэнд ч бас соёл иргэншлийн төв нь сургууль байлаа. Тэгэхлээр надад зүдрээд байх зүйл байгаагүй. Хьюгийн талаар ингэж хэлж чадахгүй л дээ. Тэр цэнхэр тэнгэр, сайхан байгаль угтана гэж бодож байсан байх. Гэтэл тэнд маш их тоостой. Кинонд бас нэг үзэгдэл байгаа. Орон нутгийн цагдаагийн даргын дүрд тоглосон Сэм Элиот бид хоёр үнээ саадаг. Сэм бол амьдрал дээр жинхнээрээ эдлэн дээр амьдардаг болохоор түүнд ямар ч амьтантай бэрхшээл байхгүй. Харин миний хувьд ямар нэгэн юмыг буруу хийгээд үнээнд тийрүүлэх вий гэхээс үнэхээр айж байлаа. Киноныхоо зохиол ёсоор миний баатар Мэрил ч хөдөөний амьдралыг огт мэдэхгүй учир үнийг хэрхэн хийхийг хэн ч зааж өгөөгүй. Үүний үр дүнд үнээ эхлээд намайг тийрч, дараа нь эврээрээ мөргөхөөр шийдсэн. Найруулагчид үнээ яаж тоглож байгаа нь их таалагдаж,онцгой анхаарлаар шагнуулсан. Энэ түүний эзэмшил газар, харин би зүгээр л гадны хүн байсан. Тэр ч надад үүнийг сайн ойлгуулсан гэж болно.
--Таны ихэр охид Огайод төрсөн гэдэг үнэн үү?
-Тийм ээ, үнэн. Тэднийг тээсэн ээж Мишель Росс тэнд амьдардаг учир нутгийнхаа төрөх эмнэлэгт амаржсан.
-Тэнд бас адал явдал тохиолдсон гэж сонссон юм байна. Орон нутгийн цагдаа Мишель та хоёрын гэрээг шар хэвлэлд зарахын тулд хулгайлсан гэсэн?
-Тэгсэн. Үүнийх нь төлөө түүнийг шийтгэсэн л дээ. Ийм юм болно гэж ёстой зүүдлээ ч үгүй байсан.
-Та яагаад заавал өөр хүнээр хүүхдээ тээлэгсэн юм бэ?
-Нэгдүгээрт, нөхөр (жүжигчин Мэттью Бродерик) бид хоёр дахин нэг хүүхэдтэй болохыг хүсч байв. Харин бүр хоёр ихэр байна гэдгийг мэдээд үнэхээр аз жаргалтай байсан. Хоёрдугаарт, бид Жеймс хүүдээ дүү бэлэглэх гэж олон зүйл хэрэглэсэн ч энэ арга л амжилт олсон.
-Жеймс ихэр дүү нараа яаж хүлээж авсан бэ?
-Ихрүүдийг анх манайд ирэхэд тэр ёстой балмагдсан. Жеймс их гайхсан байртай харагдаж байсан. Харин саяхан тэр над дээр ирээд Марио, Тавифе хоёртой хамт сургуульд явахыг хүсч байна гэсэн. Тэгээд дүү нараа хэнд ч дээрлэхүүлэхгүй гэж байна лээ.
-Таны охид сайн биз дээ?
-Баярлалаа, тэд маш сайн байгаа. Ер нь одоо манай гэр бүлд их сайхан цаг үе ирээд байна. Манай хүүхдүүд гайхамшиг л гэсэн үг.
-”Надтай ажиллахад их хэцүү. Учир нь би их үглээ, яншаа хүн” гэж Хью Грант хэлж байсан. Энэ үнэн үү?
-Хьютэй ажиллана гэдэг зүгээр л сэтгэл ханамж. Хэрвээ үнэхээр тийм хэцүү байсан бол би түүнтэй хамт кинонд тоглохгүй. Тоглолоо гэхэд зураг авалт мөд дуусахгүй байсан биз. Би түүнтэй олон жилийн өмнө хамтран ажиллаж байсан. Тэр гайхамшигтай хүн.
-Ямар кинонд вэ?
-”Эцсийн арга хэмжээ” гэдэг кино байсан. Одоо санаж байгаагаар бидний тоглосон дүр эсрэг тэсрэг байр суурьтай, нэг үгээр хэлбэл дэлгэцэн дээр зөрчилддөг. Би тэр үед түүнтэй тийм ч ойр дотно танилцаж чадаагүй ч дахин хамтарч тоглохыг маш их хүсдэг байсан.
-”Морганы гэр бүл” кинонд таныг хэн урьсан бэ. Хью Грант уу, найруулагч Марк Лоуренс уу?
-Хьюг аль хэдийнэ тоглуулахаар сонгосон байсан. Харин миний хувьд Холливудын ёс дүрмийн дагуу Марк Лоуренсийн агент минийхтэй уулзаж, Хью, Марк хоёрын бүтээх шинэ кинонд Мэрилийн дүрд тоглохыг санал болгосон. Би кино зохиолыг нь уншиж үзээд шууд л зөвшөөрсөн. Надад Нью-Йоркт Лоуренстай хамтран ажиллаж байсан хэд хэдэн найз жүжигчид байдаг. Тэд надад түүнтэй ажиллахад ямар сайхан байдгийг надад ярьж өгсөн л дөө.
-Ямар ч кинонд баатруудын харилцан яриа маш чухал. Тэр дундаа романтик инээдмийн кинонд бүр ч чухал гэдэг нь ойлгомжтой. Та киноныхоо харилцан яриаг бичилцэхэд гар бие оролцсон гэсэн?
-Бидэнд их аз таарсан л даа. Зураг авалтын өмнө нь бидэнд сургуулилт хийх, харилцан яриагаа боловсруулахад хангалттай хугацаа байсан. Дээр нь Марк, Хью хоёр эртнээс бие биенээ мэддэг болохоор бидний хамтын ажиллагааг их хөнгөвчилсөн. Миний хувьд бүх зүйлийг Марк, Хью хоёрт итгэж, тэдэнд даатгасан.
-Та багадаа инээдмийн кинонд дуртай байсан уу?
-Тийм ээ, би үнэхээр дуртай байсан шүү. Манай гэр бүл ч ялгаагүй. Бид гэр бүлээрээ арванхоёрдугаар сарын 31-нд кинотеатрт очиж инээдмийн кино үздэг уламжлалтай байлаа. Ингэж л шинэ жилийг тэмдэглэдэг байсан. Үүнээс би Оскарын шагнал хүртсэн олон кино шинэ оны босгон дээр гарч, урьдын цагт инээдмийн кино энэ нэр хүндтэй шагналыг хүртдэг байсныг ойлгосон юм. Прокатнаас кино авах болвол би инээдмийн төрлийг илүү сонгодог. Миний дүү нар их алиа, манай гэр бүлд үргэлж инээд наргиан буцалж байсан болохоор би ийм болсон байх.
-Энэ нь ч таныг жүжигчин болоход нөлөөлсөн үү?
-Мэдэхгүй ээ. Надад жүжигчин болох онцгой шалтгаан байгаагүй. Би орон нутгийнхаа сонин, телевизийн сувгаар зарласан нэгэн кинонд охидыг шалгаруулж авна гэсэн зарын дагуу л шалгаруулалтад орсон. Тэр шалгаруулалт нь ямар ч тохиолдлоор юм бидний амьдарч байсан Цинциннати хотод болсон юм. Би өөртөө тийм ч итгэлтэй охин байгаагүй. Гэвч би дүр авч чадсан нь надад маш том түлхэц болсон.
-Өөртөө итгэлгүй байсан охины хувьд таны хийсэн зүйл бол үнэхээр гайхамшиг байжээ. Яаж ингэж чадав аа?
-Хувь заяа надад яагаад энэ дүр, дараа нь ийм сайхан амьдрал бэлэглэхээр шийдсэнийг би яаж мэдэх билээ. Гэхдээ би энэ бол азтай тохиолдол, миний оронд хэн ч байж болох байсан гэдгийг хэзээ ч мартдаггүй. Тэр өдөр тэнд надаас гадна 500 гаруй охин байсан шүү дээ.
-Таныг бага байхад гэр бүлд чинь оюун санааны үнэ цэнэ эд материалынхаас илүү байсан гэж та ярьж байсан. Харин өнөөгийн гэр бүлд энэ харьцаа ямархуу байна?
-Эд материалын үнэ цэнийн хувьд бидэнд зүгээр л мөнгө байдаггүй байсан. Харин одоо Мэттью бид хоёр чинээлэг бус гэр бүлээс гаралтай. Мэттьюгийн эцэг байнгын ажилгүй жүжигчин байсан. Гэхдээ Мэттью баян алдартай болох гэж жүжигчин болоогүй. Түүнд жүжигчин ийм их мөнгө олж, баян тансаг амьдарч болно гэдэг ойлголт ч байгаагүй байх. Гэхдээ одоо үр хүүхдэдээ хуурамч уур амьсгал бүрдүүлнэ гэдэг их хэцүү юм. Юу ч болж байсан Жеймсын хувьд хүүхэд нас нь Мэттью бид хоёрынхоос огт өөр байх болно. Бид гэрэл цахилгаан, утас, түүний сургалтын төлбөрийг чөлөөтэй төлж, төрсөн өдрөөр нь маш том бэлэг авч өгч чадна. Би хүүхдийг баян орчинд хүмүүжүүлэх нь ядуу байхаас хэцүү гэж бодохгүй байна. Гэхдээ л олны ярьдгаар өлсгөлөнг давсан юм чинь тансаглалыг давах л болно.(инээв)
 -Одоо “Их хотын секс-2” киноны зураг авалт болж байгаа. Эхний кино маш амжилттай болсон. Хоёр дахь нь яах бол?
-Энэ удаа жүжигчид илүү өндөр урам зоригтой байгаа юм шиг надад санагдсан. Бид уулзалдаагүй хоёр жилийн хугацаанд бие биенээ их санажээ. Дахин уулзалдахдаа маш их баяртай байсан. Тэр тусмаа ийм их хүсэн хүлээж бйагаа киноны зураг авалт дээр шүү дээ. Энэ дүр надад яагаад ингэж их таалагддагийг би мэдэхгүй.
-Хэрвээ та жүжигчин болоогүй байсан бол ямар мэрэгжилтэй байх байсан бэ?
-Балетчин. Одоо ч би балетчин болоогүйдээ харамсдаг.
Сара Жессика Паркер 1965 оны гуравдугаар сарын 25-нд Огайо мужид төрсөн. Бүр багадаа жүжигчний авьяас нь илэрч, 10 настайдаа янз бүрийн шоунд оролцдог байжээ.
Сэтгүүлийн хавтсан дээр зөвхөн жүжигчин биш Роберт Дауни, Николас Кейж, бага-Жон Кеннеди зэрэг алдартнуудын дурлалт бүсгүйн хувиар гардаг байв.
1997 онд жүжигчин Мэттью Бродериктэй суусан. Гурван хүүхэдтэй. “Анхны эхнэрүүдийн клуб”, “Эд Вуд”, “Марс довтолж байна” зэрэг кинонд тоглосон ч “Их хотын секс” цуврал л түүнийг жинхэнэ оддын зэрэглэлд хүргэсэн.
С.БАЯР
Мэдээллийн спонсор: Нийгмийн толь
| АНУВашингтон ДС, Нью Йорк, Чикаго, Денвeр, Сан Франциско, Лос Анжелос, Сиатл, Техас, Бусад, Канад |
АЗИМонгол, Япон, Хятад, Солонгос, Сингапур, Хонг Конг, Австрали & NZ |
ЕВРОПИх Британи, Ирланд, Бельги, Герман, Чех, Норвеги,Франц, Турк, Польш, Орос, Швед |
|
Электрон бараа
