|
Алс холын Америк гүрэнд Монгол хэмээх нэрийг гаргаж буй элэг нэгтнүүд минь бий. Энэ удаад хүүхдийн хувцасны дизайнер Пүрэвийн Энхсайхныг танилцуулж байна.
-Манай уншигчдад өөрийгөө танилцуулахгүй юу?
- Миний хувьд өөрийгөө их азтай хүн гэж боддог. Хувцас загвар хэмээх энэхүү агуу урлагт хүч сорьж яваагаа би нэр төрийн хэрэг хэмээн ойлгож явна. Ялангуяа Америк хэмээх энэ агуу гүрэнд хүссэн мэргэжлээрээ ажиллаж буйдаа бахархаж байна.
-Аль хотод ажиллаж амьдарч байна?
-Сеатл хот дахь ''Nordstrom INC'' компанид эмэгтэй хүүхдийн хувцасны загвар зохион бүтээгчээр ажилладаг.
-Таны багын мөрөөдөл юу вэ? Хүмүүс 'Мөрөөдөлд хүрэх зам дардан байдаггүй' гэж ярьдаг шүү дээ. Та энэ талаар юу гэж боддог вэ?
- Би багадаа юм, юм л сонирхдог хүүхэд байсан. Сайхан амьдралын төлөө, санасан бүхнээ бүтээх юмсан л гэж мөрөөддөг байлаа.
'Мөрөөдөлд хүрэх зам дардан байдаггүй'' гэдэгт би итгэдэг. 'Миний мөрөөдөл заавал биелэнэ'' гэж бодож, тэмүүлж байна. Тэгээд ч миний мөрөөдлүүд ихэвчлэн биелдэг юм. Тийм ч учраас би өөрийгөө азтай хүн гэж хэлээд байна л даа.
-Эрх чөлөөний оронд анх хөл тавьсан тухайгаа сонирхуулаач. Эх орноо санаж байна уу?
-Америкт анх хөл тавьснаас хойш 13 жил өнгөрчээ. Хань, хүү хоёрынхоо хамт гурвуулаа ирсэн. Тэгэхэд миний хүү Тулуй дөнгөж 3 настай байлаа. Ний нуугүй хэлэхэд тэр үед Монголчууд бараг байхгүй хэцүүхэн л байсан. Америкийн зан заншлыг нэг их сайн мэдэхгүй, ер нь л барууны орны амьдралын дэг жаягт дасаагүй зэрэг бэрхшээлүүд мундахгүй тулгарч билээ. Эх орноо л их санаж байна.
-Алсын Америкийн сонин сайхныг сонсьё. Залуусынх нь ирээдүйг үзэх үзэл ямар байдаг бол. Тэд юугаар гангарч, басхүү ямар ном бестселлер болж, хэний тоглосон кино үзэгчдийг байлдан дагуулж байна вэ?
-Сонин сайхан зүйл гэвэл зөндөө л бий. Энэ бүхнийг тоочиж баршгүй. Америк залуусын тухайд онцлон хэлэхэд тэд их өвөрмөгц хүмүүс. Юу бодож, санаж байна вэ, тэр бүхнээ илэн далангүй чөлөөтэй хэлж ярьдаг. Мөн хэтэрхий хангалуун өссөн болоод ч тэр үү монгол залуустайи харьцуулбал тийм ч сэргэлэн авхаалжтай биш. Ихэнхи нь гангарах дуртай. Энэ хавар зун 1980-аад оны хувцас загвар ноёрхож байна. Тухайлбал бариу ретузэн өмд, томдсон цамц, хавтгай ултай гутлын хослол, янз бүрийн өнгийн давхар майк, сүлжмэл цамц, өргөн өмд, өргөн бүс, тод өнгийн гутал, өндөр нүсэлхийтэй даашинз зэрэг нь моодонд орсон. Номны тухайд гэвэл энэ долоо хоногт Стефэн Меирийн ''The Host'' гэдэг ном хамгийн ихээр борлогдож байна. Уг номонд харь гаригийн хүмүүс дэлхийн бие, уураг тархинд орж, тэднийг эзэлж байгаа тухай өгүүлдэг. Саяхан би нөхөртэйгээ хамт Стивен Спилбергийн шинэ бүтээл ''Indian Jones and Kingdom of Crysta; Skull'' гэдэг кино үзсэн. Кинонд Харрисон Фордын хүүгийн дүрийг бүтээсэн Шиа ЛаБеоф хэмээх залуу жүжигчин манайхны хэлдгээр ''Од'' болж байна.
-Та эцэг эх, ахан дүүсээ, эх нутгаа үе үе санагалздаг, бас тэднийгээ зүүдэлдэг байх. Энэ удаад Монгол орон таны зүүдэнд хэрхэн орсон бэ гэсэн сониуч асуулт тавьмаар санагдлаа.
-Зүүдэнд минь Монгол орон өмнөх дүр зургаараа л орж ирдэг. Ноднин зун эх орондоо очиход арай хөгжингүй болчихсон байсан.
-Уран бүтээлчид аливааг өөрөөр харж сэтгэдэг учраас дээрх асуултыг тавьсан юм шүү. Монголдоо хэзээ нэгмөсөн ирэх вэ?
-Яг төдийд эх орондоо бүрмөсөн очно гэж амлаж чадахгүй нь ээ. Гэхдээ хэзээ ч юм бэ очно оо. Хүүхдүүд нас биед гүйцэж тус тусдаа амьдрал зохиохоор нь Монгол нутагтаа амьдарна.
-Таны ажилладаг компани Америктаа хэр нэр хүндтэй вэ? Үйлдвэрлэлийн хэдэн хувийг хүүхдийн хувцас эзэлдэг бол?
-Нордстром Инк компани бол Америктаа алдартай компаниудын тоонд ордог гэж би үздэг. Жонн В Нордстром гэдэг Швед эрхэм анх 1901 онд гутлын дэлгүүр нээж, тус компанийг үүсгэн байгуулсан. Нордстром нэртэй 110-аад дэлгүүр 28 мужид бий. ''Nordstrom Rack'' гэдэг 50-иад дэлгүүр, The Grill Restaurant, Nordstrom Cafe, E Bar coffee shop, NOrdstrom Bank, Nordstrom.com интернэт дэлгүүр ажиллаж байна. ''Nordstrom Product Group'' компани эмэгтэй, эрэгтэй, хүүхдийн хувцас, гутлын загвар зохион бүтээж, үйлдвэрлэн дэлгүүрээрээ борлуулдаг. Тус компанийн дэлгүүрүүд үйлчилгээ сайтайгаараа алдартай. Хүүхдийн хувцасны тухайд багахан хувийг эзэлдэг.
-Хувцасны дизайнер гэдэг таны сонирхон сонгосон мэргэжил тань уу? Эсвэл санаандгүй тохиолдлоор, магадгүй сонирхон дурласан зүйл тань энэ урлагт татав уу?
-Ээж аавынхаа л зөвөлгөөг дагасан хэрэг. Би уг нь олон улсын эдийн засагч болохыг хүсдэг байсан юм. Харин ээж маань Чи зураг зурж, тоо бодож чаддаг шүү дээ. Энэ бол их сайхан мэргэжил, эмэгтэй хүнд яг тохирно гэж ятгаад л намайг элсэлтийн шалгалтанд оруулчихсан.
-Америкт загварын ямар чиг хандлага давамгайлж байна вэ?
-Залуучууд, дундаж ба ахмад настай хүмүүсийн хувцас загвар зонхилж байна.
-Охид их адтай, гоёх дуртай байдаг. Та бяцхан охин байхдаа хүүхэлдэйндээ даашинз оёдог байв уу? Өөрийгөө хэр гоёх дуртай байсан бэ?
-Тиймээ, би 5-6 настайдаа хүүхэлдэйнүүддээ янз бүрийн хувцас урладаг байлаа. Миний ээж Байгаль их уран хүн. Өөртөө болон хүүхдүүддээ хэрэгцээтэй зүйлсийг оёчихдог байлаа. Тийм учраас надад даавууны өөдөс их олддог байсан даа. Хэрэв даавууны өөдөс олдохгүй бол цонхны хөшигнөөс тасдаж аваад ээждээ загнуулж байсан түүхтэй.
-Багадаа урладаг байсан хүүхэлдэйн даашинзныхаа загварыг уран бүтээлдээ тусгадаг уу?
-Үгүй дээ. Жаахан байсан юм чинь тийм ч сайн загвар бүтээгээгүй биз дээ.
-Таныг охидын хувцасны загвар зохион бүтээдэг гэж сонссон. Эмэгтэй хүүхдийн хувцас материалаасаа авахуулаад л их зөөлөн байх ёстой байх даа?
-Би есөн сартайгаас зургаан нас хүртэлх эмэгтэй хүүхдийн хувцасны чиглэлэээр голдуу ажиллалаа. Заримдаа долоон настайгаас 16 насны охидын хувцасны чиглэлээр ч ажиллана. Сүүлийн үед эрэгтэй хүүхдийн хувцасны ганц, хоёр загвар зохион бүтээсэн. Ер нь хүүхдийн хувцас. ялангуяа дөрвөөс доош насны хүүхдийн хувцсанд их болгоомжтой хандана. Хамгийн гол нь материал нь зөөлөн байх, арьсанд ямар нэгэн харшил өгөхгүй байх, товч, гоёл сэлт нь унаж тасрахгүй байх гээд хүүхдийн эрх ашгийг хамгаалсан олон дүрэм бий.
-Ер нь яагаад эрэгтэй хүүхдийн хувцас биш, охидын хувцас загварын чиглэлийг сонгосон юм бэ?
-Өхөөрдөм хөөрхөн болохоор нь би энэ чиглэлээр ажиллахыг хүссэн. Тэр үед Есүй гэдэг бяцхан охинтой болохоор ч тэр үү охидын хувцасны чиглэлээр ажиллаж байна. Огин маань одоо 5 настай, түүнийгээ загвар өмсөгчөө болгоно. Миний охин ээжийнхээ урласан загваруудыг өмсдөг юм.
-Америкт хүүхдийн хувцас загварын шоунд оролцож байсан уу? Ямар ямар загваруудаараа оролцсон бэ?
-Одоохондоо загварын шоунд оролцож амжаагүй байна.
-Загвар гэснээс бүтээлдээ ямар нэр өгдөг вэ? Ихэвчлэн үлгэрийн гүнж, хүүхэлдэйн киноноос сэдэвлэн нэр өгдөг үү?
-Нэг их нэр өгөөд байдаггүй. Амждаг ч үгүй. Голдуу Тийм дугаарын богино, урт ханцуйтай цамц гэж нэрлэдэг. Улиралд 60-100 гаруй загвар зохион бүтээж байна.
-Та монгол охидод зориулан загвар зохион бүтээсэн үү? Энэ тухайгаа сонирхуулна уу?
Миний зохион бүтээсэн загварууд монгол охидод маань таарна. Тийм учраас яг зорьж загвар зохион бүтээгээгүй.
-Та загвар зохион бүтээхээс гадна ямар авьяас, сонирхолтой юм бэ?
-Гэрийн засал чимэглэл хийх, хашаандаа цэцэг тарих дуртай. Миний бага хүү Сүбээдэй өмнө нь цэцгүүдийг минь таслаад хаячихдаг байсан бол одоо овоо ухаан орж, Ээжээ, таны цэцэг ургаж байна гэдэг болсон.
-Олон улсад хүүхдийг эрүүл орчинд өсгөж хүмүүжүүлэх асуудал тулгамдаж байна. Тэдний тоглодог тоглоом, хувцасны материалд анхаарал хандуулаад эхэллээ. Америкт энэ талаар ямар арга хэмжээ авч байна вэ?
-Миний компани энэ талаар маш хатуу шаардлага тавьж ажилладаг. Бага насны хүүхдүүдийг эрүүл саруул, аюулгүй өсгөн бойжуулахын тулд хувцасны материалд их анхаарал тавьдаг. Жишээлбэл, хэрэглэж буй цахилгаан болон ердийн товч, даавуун материалын орц, будаг гэх мэтийн химийн найрлага шаардагдаж байна. Эдгээрийг манайд зөвхөн баталгаат компаниуд л нийлүүлдэг. Америкчууд хүүхдүүдийн төлөө их анхаарал тавьдаг учраас би Монгол улс хүүхдүүдийн төлөө анхаарал тавих байх гэж найдаж байна.
Эх сурвалж: Хөөрөх цэг
| АНУВашингтон ДС, Нью Йорк, Чикаго, Денвeр, Сан Франциско, Лос Анжелос, Сиатл, Техас, Бусад, Канад |
АЗИМонгол, Япон, Хятад, Солонгос, Сингапур, Хонг Конг, Австрали & NZ |
ЕВРОПИх Британи, Ирланд, Бельги, Герман, Чех, Норвеги,Франц, Турк, Польш, Орос, Швед |
|
Электрон бараа
