ГАДААД ХАРИЛЦААНЫ САЙД Л.БОЛД БНХАУ-ЫН ТӨРИЙН ЗӨВЛӨЛИЙН ГИШҮҮН ДАЙ БИНГУОТАЙ УУЛЗАВ
Гадаад харилцааны сайд Л.Болд Монгол Улсад албан ёсны айлчлал хийхээр хүрэлцэн ирсэн БНХАУ-ын Төрийн Зөвлөлийн гишүүн Дай Бингуотай 2012 оны 8 дугаар сарын 23-ны өдөр уулзав.
Монгол Улсын Гадаад харилцааны сайд Л.Болдыг хариуцлагатай, өндөр албанд томилогдсонтой нь холбогдуулан БНХАУ-ын Гадаад хэргийн сайд Ян Жэчи баяр хүргэж, амжилт хүсснийг Төрийн Зөвлөлийн гишүүн Дай Бингуо уламжлав.
Л.Болд БНХАУ-тай сайн хөршийн найрсаг харилцааг урт хугацаанд тогтвортой хөгжүүлэх нь Монгол Улсын гадаад бодлогын тэргүүлэх чиглэл болохыг нотлоод, Монгол, Хятадын стратегийн түншлэлийн харилцааг улам бүр гүнзгийрүүлж, шинэ агуулгаар баяжуулан хөгжүүлэхийн төлөө БНХАУ-ын Төрийн Зөвлөл, ГХЯ-тай идэвхтэй хамтран ажиллахаа илэрхийллээ.
Дай Бингуо хятадын тал Хятад, Монголын харилцаанд өндөр ач холбогдол өгдгийг тэмдэглээд хоёр улсын харилцааг улам гүнзгийрүүлэн хөгжүүлж, хөрш орнуудын харилцааны жишиг болгохыг хүсч байдгийг илэрхийлэв.
Уулзалтын үеэр бүс нутаг, олон улсын харилцааны сонирхсон асуудлуудаар мөн санал солилцов.
Wang Lei
Ambassador Assistant