Их Британийн парламентын гишүүнийг хөнөөжээ

ЛОНДОН. /ВВС/. Английн хойд нутагт Их Британийн нэгэн хууль тогтоогчийг буудаж, хутгалан хөнөөсөн хэрэг гарлаа.

Их Британийн сөрөг хүчний Хөдөлмөрийн намын гишүүн Жо Кокс пүрэв гарагт Баруун Йоркшир хотод халдлагад өртсөн гэж цагдаа нар мэдэгдэв.

Халдлага болсон газрын ойролцоогоос цагдаа нар 52 настай эрэгтэйг баривчилжээ.

Жо Кокс Их Британийг Европын Холбооны /ЕХ/ гишүүн хэвээр үлдэхийг дэмжигчдийн "Үлдье" кампанит ажил өрнүүлэгчдийг дэмжиж байжээ. Их Британийг ЕХ-нд үлдэх эсэхийг шийдэх бүх нийтийн санал асуулга удахгүй болох гэж байгаа билээ.

Их Британийг ЕХ-ноос гарахыг дэмжигчид болон эсэргүүцэгчид кампанит ажлаа  өчигдөр зогсоосон байна.

“Европын хүчирхэг Британи” кампанит ажил өрнүүлэгчид кампанит ажлаа зогсоож байгаагаа Твиттерээр мэдэгдээд “бид Жо Кокс гишүүний ар гэрийнхэнтэй хамт” гэжээ.

“Европыг орхиё” кампанит ажил өрнүүлэгчид мөн адил кампанит ажлаа зогсоож байгаагаа “Reuters” агентлагт мэдэгдсэн байна.

Их Британи ЕХ-ны бүрэлдэхүүнээс гарах эсэхийг шийдэх бүх нийтийн санал асуулга энэ сарын 23-нд болно.