ТУРКИЙН НҮҮРСНИЙ УУРХАЙД ДЭЛБЭРЭЛТ БОЛЖ, 150 ГАРУЙ ХҮН АМИА АЛДЛАА
Туркийн баруун нутгийн нүүрсний уурхайд дэлбэрэлт болсны улмаас 150 гаруй уурхайчин амиа алджээ.
Туркийн Эрчим хүчний сайд Танер Ыльдыз Маниса мужид ослын газарт очсон байна. Түүний хэлснээр, өчигдөр үд дунд болсон дэлбэрэлтэд 151 уурхайчин амиа алдаж, 77 уурхайчин гэмтэж бэртжээ.
Газрын гадаргуугаас доош хоёр орчим км гүн тус бүсэд дэлбэрэлт болох үед хэдэн зуун уурхайчин ажиллаж байжээ. Уурхайн гүнд гарах гарцгүй болсон уурхайчдыг гаргахаар аврагчид ажиллаж байна.
Яагаад дэлбэрэлт болсон нь тодорхой бус байна. Гэхдээ холбогдох албаны хүмүүсийн хэлснээр, уурхайн цахилгааны системд саатал гарснаас дэлбэрэлт болсон бололтой.
Туркийн Ерөнхий сайд Режеп Тайип Эрдоган хохирогчдын ар гэрийнхэнд эмгэнэл илэрхийлсэн байна. Тэрбээр ослын газарт очихын тулд дипломат айлчлалаа цуцалжээ.
Эдийн засаг нь хөгжиж буйтай зэрэгцэн нэмэгдэж байгаа эрчим хүчний эрэлт хэрэгцээгээ хангахын тулд Турк улс ашигт малтмалын уурхайнууддаа олборлолт хийж байгаа билээ. Гэхдээ мэргэжилтнүүдийн үзэж буйгаар, хангалттай тоног төхөөрөмж байхгүй, ажиллах орчин нөхцөл тааруухан зэрэг хүчин зүйлийн улмаас уурхайн осол гарсаар байна.
Г.Доржханд