Уул уурхайн дэд сайд О.Эрдэнэбулган “Хүрэн нүүрсийг гүн боловсруулж, шатах хий гарган авах хоёр үйлдвэр байгуулж, бүтээгдэхүүнийх нь 95 хувийг БНХАУ руу хийн хоолойгоор нийлүүлнэ. Тодруулбал, 2019 оноос Монгол Улсад шатах хий үйлдвэрлэж эхэлнэ” хэмээн өнгөрсөн долоо хоногт “Bloomberg”-т ярьлаа. Энэхүү гэрээг ирэх сард байгуулж магадгүй гэнэ. 

Уул уурхайн яамнаас сар бүр уламжлал болгон зохион байгуулдаг “Ил тод уул уурхай” хэвлэлийн бага хурал өнөөдөр болж, Ууул уурхайн дэд сайд О.Эрдэнэбулган болон бусад албаны хүмүүс энэ сард буюу энэ сарын геологи, уул уурхай, газрын тосны салбарт хийгдсэн томоохон ажлуудаа танилцууллаа.

“Оюутолгой” ХХК энэ оны 2 дугаар улиралд 7.8 сая тонн орчим хүдэр боловсруулж, 25.8 хувийн зэсийн агуулгатай 140 мянган тонн зэсийн баяжмал үйлдвэрлэсэн байна. Энэ нь өмнөх улирлаас 36 хувиар өссөн үзүүлэлт юм. Үйлдвэрлэсэн зэсийн баяжмалд 36.2 мянган тонн зэс, 113 мянган унци алт, 229 мянган унци мөнгө багтжээ.