Америкт ажилчин болсон түүх: Хэл сурахад шалтаг хэрэгтэй
Энэ сард ажил хийсэн гэх хэцүү , бас хийгээгүй ч гэж болохооргүй өнгөрөв . Бэлэнчлээд хоёр ч агентлагаас ажил авсан чинь " нестандартный " хүмүүс өгөөд , санаанд огт таараагүй , дараа нь бодоход "борлогддоггүй бараа " -гаа шахсан юм билээ . Ер нь ажилгүй боллоо гэдэгт нэг их санаа зовдоггүй хүн л дээ . Өр шир , хүүтэй хугацаатай зээл гэх мэт юмгүй болохоор олдсон болгоныг хийхгүй , голж шилдэг ухаантай . Хэн ч байсан тэгнэ л дээ .
Би докторынхоос нүүгээд Сан Францискод эргээд ирэв . Яахаараа тэгдэг юм бүү мэд , өөр тийшээ яваад энд л эргээд ирдэг , ирье гэж учиргүй хүсээд байдаггүй хэрнээ нүүдлийн зам ийшээ чиглэчихсэн байдаг юм . Уламжлал ёсоор хэд хоног амрахаа мартсангүй , гэхдээ арай соёлтойхон , номын санд очиж интернэтэд суух , далай руу аялал хийх . кинотеатрт кино үзэж өнгөрөөгөөд шинэ " томилолт " - оо авлаа .
Хоёр долоо хоногт би 5 " охин " солив . Манай " мэргэжилтнүүд " сайхан зантай үедээ эмээ нараа ингэж нэрлэдэг юм . Муу дураа хөдөлбөл хэрэглэдэг бас нэг " нэр томъёо " бий , гэхдээ би одоо уурлаагүй байна . Тэгсэн дандаа " харш " жилтэй хүмүүс таардаг юм . Уг нь урт , өндөр , өргөн , жин , IQ , хурд , багтаамж гээд параметрууд нь ялгаатай мөртөө эцсийн үр дүн нь бүгд ижилхэн гардаг гэнээ .
Эхний ажлаа нэг агентлагаас авав . Сонины ч юм уу бусад зараар ажил олж болно л доо . Гэхдээ их шалгууртай байдаг болохоор заримдаа амарчлаад зуучлалын агентлагаас авдаг юм . Яагаад гэвэл " ар нь түүз " , миний өмнөөс клиенттэй гэрээ хийчихдэг учраас ямар ч " мөрдөн байцаалт " -гүй шууд ажилдаа орчихно .
За энэ " охин " маань нилээд өндөр настай , " санах байгууламж " нь ердөө 5 минут л ажиллана . Нэг охинтойгоо , тиймээ жинхэнэ охин нь 70 орчим настай байхаа , хамт амьдардаг , тэр нь гэр аж ахуйн ажлаа даачих юм .
Эмгэн яахав өдөржин " гимнастик " хийнэ . Ганцаараа хийж чадахгүй учраас заавал " партнер " хэрэг болно. Сууя гэхээр нь татаад суулгаад өгнө , хэдэн минут болоод хэвтье гэнэ , суугаад л , хэвтээд л , суугаад л ... давтамж нь хэдхэн минут .
Би юу гэж дуугүй байхав , та дөнгөж сая суусан ш дээ гэхээр үгүй ээ би төдөн цаг хэвтлээ гэнэ . Хэдэн минутын өмнө хийсэн үйлдлээ мартчихна . Ингээд " робот " болсон чинь эмгэн биш би шургаж унах нь ээ . Ганцхан өдөр ажиллаад залхаад яваад өгсөн .
Дараагийн гурван ажил бас санаанд нийцсэнгүй хоёр гурван хоног ажиллаад больсон , нэг нь сэтгэхүйн хувьд гажигтай , нөгөө нь шөнө унтуулахгүй 24 цагаар ажиллуулах гээд , гурав дахьтай нь амралтын цаг дээрээ тохирсонгүй .
Эцэст нь нэг эмгэн санал болголоо , очсон чинь уг нь эхэндээ гайгүй юм шиг байсан чинь яваандаа зэс нь цухуйдаг юм . Их бүдүүлэг хүн байсан , олон ч асрагч сольсон юм билээ , бид хоёр хэдэн удаа " байлдаад " сүүлдээ миний тэвчээр барагдаж сургуульд сурлаа гэж шалтаг зохиогоод салсан даа .
Тэднийх , дандаа өндөр настан зуун тавиад айл хөнгөлөлттэй хөлс төлж амьдардаг том байшинд байсан . Яг тийм байрны сарын түрээсний үнэ 800 - 900 $ байхад тэд зөвхөн 250 - ийг төлдөг , бодвол тэр еврейгийнх нь нийгэмлэг юм уу холбооноос ( би өөр газар өгч байхыг хараагүй ) долоо хоног бүр хайрцагтай хоол хүнс , зарим эм гэх мэт юмнууд үнэгүй өгдөг , их гавьяатай улсууд байдаг байх гэж бодмоор .
Тэгэхэд манай " гавьяат " далан хэдэн настайдаа америкт ирсэн , нэг өдөр ч ажиллаагүй , нэг ч центны татвар төлж үзээгүй хүн шүү дээ . Тэндэхийн оршин суугчдын ихэнх нь еврей , цөөхөн хятад , цагаан америкчууд , харин асрагч нар бол " өнгө өнгө"-өөрөө байна даа .
Тэнд надаас гадна нэг монгол хүүхэн ( нэг монгол эрэгтэй байсан ч зав байдаггүй байсан ) ажилладаг , бид хоёр нэг филиппин эмэгтэй , бас нэг хар ( арьстай ) хүнтэй дөрвүүлээ " фракц " байгуулаад хааяа нийлж паариддаг , хожим нь бүгдээрээ ажлаа солиод тал тал тийшээ явцгаасан ч нөхөд хэвээрээ үлдэж одоо ч холбоотой байгаа .
Тэгээд сургуульд сурна гэж эмгэнийг хуурсан биш , "роль"-доо итгээд тэр дороо гүйж очоод хэлний сургалтанд бүртгүүлчихэв ээ . Дандаа ажил ажил , завгүй гэдгээр түрүү бариад суръя гэж боддоггүй л байсан байхгүй юу . Эмгэн бид хоёрын олон удаагийн үзэл суртлын " дайн " миний ялалтаар төгсөж , " хорчин " -гоосоо салснаар барахгүй номын дуу сонсохоор явж одов оо ...
Эх сурвалж: http://altargana.blog.banjig.net/post.php?post_id=12156