"Оюу толгой" ХХК ухаалаг малгай технологи нэвтрүүлэв
“Оюу толгой” ХХК үйл ажиллагааныхаа олон хэсэгт “SmartCap” буюу “Ухаалаг малгай” хэмээх орчин үеийн, хамгийн дэвшилтэт технологи бүхий аюулгүй ажиллагааны хөтөлбөрийг өнөөдрөөс хэрэгжүүлж эхэлжээ.
SmartCap хэмээх энэхүү төхөөрөмжийг операторчийн малгайнд суурилуулснаар тухайн ажилтны тархины үйл ажиллагаанд тодорхой хэмжээнд хяналт тавих боломжтой болж байгаа аж. Тухайлбал том ачааны машины жолооч зүүрмэглэх эрсдэлтэй байвал “Ухаалаг малгай” нь сэрэмжлүүлэх дохиог жолоочид болон хяналтын өрөөнд хүргэх юм байна. Мөн операторч, жолооч нарт алжаал ядаргаагаа зохицуулахад нь дэмжлэг үзүүлэх, ядарч, зүүрмэглэснээс үүдэн осол гарах эрсдэлийг бууруулах, энгийн, ноосон гэх мэт малгайнд зүүдэг бөгөөд тархины үйл ажиллагааг хянадаг, батлагдсан аргачлал дээр суурилсан гэх мэт давуу талтай аж.
Уул уурхайн салбарт аюулгүй ажиллагааг сайжруулах зорилготойгоор тусгайлан зохион бүтээсэн энэ технологийг анх Рио Тинто группийн Австрали дахь нүүрсний уурхайд хэрэглэжээ.
“SmartCap” хөтөлбөр хэрэгжиж эхэлж буйтай холбогдуулан “Оюу толгой” ХХК-ийн ерөнхийлөгч бөгөөд гүйцэтгэх ерөнхий захирал Эндрью Вүдлэй “Бид аюулгүй ажиллагааны гүйцэтгэлээ улам сайжруулах, орчин үеийн технологийг ашиглах боломжтой болж буй нь чухал ач холбогдолтой. “SmartCap” нь цаашид манай хамт олонд алжаал ядралтаа зохицуулахад нь тусалж, ноцтой бэртэл гэмтэлд хүргэж болохуйц аливаа эрсдэлийг бууруулах боломжийг бүрдүүлж байгаад таатай байна. Энэ технологи нь манай аюулгүй ажиллагааны арга хэрэгсэлд чухал багаж болон нэмэгдэж байна” гэжээ.
