НЬЮ-ЙОРКИЙН НИСЭХ БУУДЛУУД ХААЛГАА БАРЬЖЭЭ

  Ойртон ирж байгаа "Сэнди" далайн хар салхи нислэгийн аюулгүй байдалд ноцтойгоор нөлөөлж болзошгүй байгаа тул Америкийн хамгийн том хотуудын нэг болох Нью-Йоркийн нисэх буудлуудыг хаажээ.

Оросоос ниссэн онгоцнууд буудаг Жон Кеннедигийн нэрэмжит олон улсын нисэх буудал өнөөдөр болон маргааш ажиллахгүй хэмээн "Аэрофлот"-ын төлөөлөгчийн газрын тэргүүн Андрей Новокшонов ИТАР-ТАСС-ын сурвалжлагчид мэдэгдлээ. Зөвхөн ням гарагт л гэхэд 700 гаруй нислэг цуцлагдсан байна.

Хэрвээ ус цаг уурчдын таамаглал зөрж, "Сэнди" хар салхи Нью-Йорк хотыг тойрон өнгөрөх аваас нисэх буудлууд өнөөдөр үдээс хойш нээгдэх гэнэ.
"Сэнди" хар салхи өнөөдөр үдээс өмнө Нью-Йорк хотыг бүхэлд нь дайран өнгөрнө хэмээн үзэж байгаа гэнэ. Атлантын далайн эрэг дагуух газрын оршин суугчдыг нүүлгэн шилжүүлж байгаа бөгөөд Нью-Йоркт л гэхэд нийтийн тээврийн хэрэгслүүдийн хөдөлгөөнийг хэсэгчлэн хязгаарлаад байна.
С.Амар