“Ногоон карт” виз олгоход нөлөөлнө
АНУ-д байнга оршин суух эрх олгодог “ногоон карт”-ын сугалаанд оролцох нь тус улсад нэвтрэх виз олгоход сөргөөр нөлөөлж болзошгүй, гэхдээ бүх зүйл тухайн тохиолдлоос шалтгаална гэж АНУ-ын Төрийн департаментын визийн асуудал хариуцсан даргын орлогч Дэвид Донахью мэдэгджээ.
“Бүх зүйл тухайн тохиолдлоос хамаарна. “Ногоон карт” сугалаанд оролцож байгаа хүн цагаачлалын бус виз авах шаардлагыг хангаж байж болно, олон ч хүн тийм виз авсан байдаг. Гэхдээ “ногоон карт” бөглөсөн хүн одоо шууд АНУ-д очихыг хүсч байвал тухайн хүн жуулчны визийг ашиглан АНУ-д хууль бусаар үлдэхээр оролдож байна гэх үндэслэлийг бий болгож байгаа учир ЭСЯ-ны төлөөлөгч түүнд виз олгодоггүй” гэж Донахью гадаадын хэвлэлийнхэнд зориулан хийсэн хэвлэлийн бага хурал дээр мэдэгджээ.
Америкийн “ногоон карт” сугалаанд оролцох хүсэлтийг 10 дугаар сарын 4-нөөс авч эхлэх аж. Уг сугалаанд оролцсон гадаадын 50 мянган иргэн АНУ-д байнга оршин сууж, ажиллах эрхтэй болно. Хүсэлтийг 2011 оны 11 дүгээр сарын 5-ны өдрийг хүртэл хүлээн авна. Өнгөрсөн жил 14,8 сая орчим хүн сугалаанд оролцжээ.
З.Амгалан / Монцамэ /