Беркелийн их сургууль монгол хэл дахин зааж эхэллээ

orloo

09/30/2015

Сан Франциско

Калифорнийн их сургуулийн Беркели дэх салбарт 9 дүгээр сарын 26-ны өдөр тус их сургууль дээр Монгол судлалын төв байгуулагдаж, монгол хэлийг дахин зааж эхэлсэнтэй холбогдуулан “Mongolian Celebration” арга хэмжээг Монгол сан /The Mongolia Foundation/, тус сургуулийн Зүүн Ази судлалын хүрээлэн /The Institute of East Asian Studies/, Сан Франциско дахь Монгол Улсын Ерөнхий консулын газар хамтран зохион байгууллаа.

20150930 003

Калифорнийн их сургуулийн Беркели хот дахь салбар нь 1935 оноос 1996 он хүртэл монгол хэлийг зааж ирсэн АНУ дахь Монгол судлалын гол төвийн нэг байсан бөгөөд энэ оны 9 дүгээр сараас монгол хэлийг дахин заах болж, Монгол судлалын төвийг сэргээн байгуулсан юм. Дэлхийд эхний аравт жагсдаг нэр хүндтэй сургуулийн нэг болох Беркелийн их сургуульд ийнхүү монгол судлалыг дахин сэргээсэн нь АНУ-ын Монгол судлалын түүхэнд шинэ хуудсыг нээсэн үйл явдал юм. Монгол судлалын төвийг нээж, үйл ажиллагааг нь сэргээхэд зориулж Монгол Улсын Засгийн газраас ихээхэн ач холбогдол өгч, тодорхой хэмжээний санхүүгийн дэмжлэг үзүүлсэн юм.

20150930 005

20150930 006

Энэхүү арга хэмжээний эхний хэсэгт “Мэдлэгийн археологи: Монгол дахь эд өлгийн болон архивийн шинэ олдворууд“ /Archeology of Knowledge: New Archival and Material Discoveries in Mongolia”/ сэдэвт олон улсын эрдэм шинжилгээний бага хурал боллоо. Хуралд манай улсаас Монгол судлалын Үндэсний зөвлөлийн нарийн бичгийн дарга Б.Заяабаатар, ШУА-ийн Олон улсын харилцааны хүрээлэнгийн салбарын эрхлэгч, доктор О.Батсайхан, Улаанбаатар их сургуулийн Археологийн тэнхимийн эрхлэгч, доктор, профессор Д.Эрдэнэбаатар, МУИС-ийн Археологи, антропологийн тэнхимийн багш, доктор У.Эрдэнэбат, Беркелийн их сургуулийн багш, доктор Ц.Уранчимэг, Йелийн их сургуулийн доктрант, археологич Б.Жаргалан, археологич эрдэмтэн Наран Фолкнер нар оролцож, сонирхолтой илтгэл тавилаа.

20150930 007

20150930 008

Хуралд АНУ-аас тус их сургуулийн Урлаг судлалын тэнхимийн профессор П.Бергер, Монгол судлалын тэнхимийн эрхлэгч Б.Бауманн, Индианагийн их сургуулийн Монгол судлалын төвийн захирал, профессор К.Этвүүд, Калифорнийн их сургуулийн Санта Барбара дахь салбарын профессор В.Вэллэнс, Риверсайд дахь салбарын профессор судлаач М.Кинг нар Монгол судлалын асуудлаар эрдэм шинжилгээний илтгэл тавив.

20150930 010

Олон улсын эрдэм шинжилгээний бага хурлын дараа монгол үндэсний урлагийн тоглолт бүхий хандивын зоог болж, Оакланд дахь “Гэр” төвийн авьяаслаг хүүхдүүд уран бүтээлээ сонирхуулав. Хандивыг Беркели их сургуулийн номын санд 50 гаруй жил хадгалагдаж буй монгол номуудыг каталогжуулах, монгол хэлний сурах бичиг хэвлүүлэх, тус сургуульд суралцаж буй монгол оюутнуудаа дэмжихэд зориулах юм.

20150930 009