Өнөөдөр Орлоо сайтын 8 жилийн ойн баярын өдөр!

2005 оны 6 сард Oрлоо.ком-г бүртгүүлэн вэб хуудсаа олны сонорт хүргэн, улмаар  2006 оны 11 сарын 26-нд бид Вашингтон ДС хотноо Орлоогийнхоо 1 жилийн ойг тэмдэглэж байлаа. 8 жил гэдэг багагүй хугацаа.

2005 оноос ажиллаж эхэлсэн Орлоо.ком маань тэр үеийн АНУ-д суугаа оюутан залуусаа нэгтгэх, шинээр ирж байгаа Монголчууддаа хэрэгтэй мэдээ мэдээллээр хангах, хооронд нь харилцуулах, хууль эрхзүйн ойлголт болон гадаад орнуудад болж буй үйл явдлуудыг шуурхай хүргэх зорилготойгоор үйл ажиллагаагаа нээж байсан юм.

Тэр үед бидний зорилго ойлгомжтой байсан. Юун түрүүнд гадаад оронд ирээд шинэ байр, шинэ ажил сургууль зэрэг бүх зүйлд шинээр орохоор болдог тийм ч учраас билэг дэмбэрэлтэйг нь бодож Орлоо нэрийг сонгож байлаа.
Интернэт гэх агуу их орон зайд зөвхөн амьдарч байсан хот, мужийнхаа Монголчуудад зориулна гэж хүрээндээ баригдсангүй улам өргөжин тэлнэ гэж үзэн өөрсдийгөө Дэлхий даяар тархан суугаа Монголчуудын зар мэдээ мэдээллийн нэгдсэн төв гэх болсон.
Тухайн цаг үетэйгээ холбогдуулан олон шинэлэг санаануудыг хэрэгжүүлж, анхдагч болж байсны дээр гадаадад амьдарч байгаа Монголчуудынхаа хоорондын харилцааг сайжруулж, мэдээ мэдээллээ солилцох орон зайг нь бүрдүүлж чадсан билээ. АНУ-ын олон муж хотуудын монголчууд төдийгүй монгол хүн аж төрөн суугаа дэлхийн олон орноос хандан хэрэгтэй мэдээллээ олох, мөн өөрсдийн үзэл бодлоо чөлөөтэй илэрхийлж байх чөлөөт индэр болсон.
 
Та бүхэн санаж буй бол Орлоо сайт ноднин Дэлхийн Монгол шагналыг хүртэж байсан билээ.

8 жилийн турш бидэнтэй хамт байж дэмжиж байдаг та бүхэндээ баярлалаа.
Баярын мэнд хүргэе!
Орлоо сайтын хамт олон!