ЧАС УЛААН ТУГ
Хотын Намын Хорооны байшин дээрх
Гал улаан туг!
Хожмоон гэмшсэн ч өршөөхгүй гэх шиг
Час улаан туг
Нэгэн цагийг эзэгнэсэн байшин дээрх
Гал улаан туг
Нэхэж цагаатгаж өгөөч гэж гуйсан ч эс тоох
Час улаан туг
Ардчилал, шинэчлэл ирсэн ч бай, хамаагүй
Түс улаан туг
Аливаа өнгөрсөн, улирсантайгаа зууралдах
Хурц улаан туг
Хотын Намын Хорооны байшин дээрх
Гал улаан туг
Гандаа ч үгүй
Гандах ч үгүй
Час улаан туг
Байшин доторх хүмүүс нь солигдсон ч
Бахь улаан туг
Өөрчлөлт болсон нь үнэн юм уу гэх шиг
Үнэн улаан туг
Амьдарч ирсэн мянган маань улирсан ч
Амьд улаан туг
Туг ч яахав
Цаг өөр болсон гэвч
Час улаан туг
Хорвоо тэр чигээрээ эргэчихээд байхад ч
Гал улаан туг
Хорин нэгдүгээр зуун ирчихээд байхад ч
Час улаан туг
Хотын Намын Хорооны байшин дээрх
Ув улаан туг
Хонгор гишүүдийнх нь зүрхний угт
Час улаан туг!
Анхаарал тавьсанд баярласан
Л.БАТБАЯР
6 – 18 – 2012.