ТОМЧУУД

Аливааг нягт нямбай хий гэж сургачихаад

Аяга сэтрэхэд хүртэл зэмлэдэг хирнээ өөрсдөө

Архи балгачихаад болор хагалсандаа ч харамсдаггүй томчууд

Айлын хүүхдийн тоглоомонд

Битгий гар хүр гэж сургачихаад

Ажлаасаа томоо банз чирээд ирдэг томчууд

Эцэг эхийн хурлаас ирээд

Энхрийлэлгүй надад өөрсдөө гар хүрдэг томчууд

Тэдний захисныг бид үргэлж биелүүлнэ

Тэд бидний санаанаас дандаа зөрнө

Бие том ч ухаан дэгдээхэй томчууд

Бид тэднийг дуурайхгүй ээ ерөөсөө