ДОНЫН РОСТОВ. /RIA Novosti/. Украинд мөргөлдөөн эхэлснээс хойш ОХУ-ын Ростов мужид дүрвэн ирсэн украинчуудын 3000 орчим нь Оросын иргэн болохоор төлөвлөж байгаа ажээ. Энэ тухай Оросын Цагаачлалын албаны мужуудын асуудал эрхэлсэн газрын дарга Михаил Симоненко мэдээлсэн байна.

БАГДАД. /Reuters/. Иракийн нийслэл Багдад хот дахь НҮБ-ын төлөөлөгчийн газрын мэдэгдсэнээр, өнгөрсөн сард тус улсын 1119 иргэн амь үрэгджээ. Гэхдээ “Лалын улс” бүлэглэлийн хяналтад байгаа бүсүүдэд амь үрэгдсэн хүмүүс энэ тоонд багтаагүй учир үүнээс ч  олон хүн амь үрэгдсэн байж магадгүй.

МОСКВА. /RIA Novosti/.  “Лалын улс” бүлэглэлийн босогчид Их Британийн сэтгүүлч Жон Кэнтлигийн ээлжит дүрс бичлэгийг интернэтэд байрлуулжээ. Тэрбээр дүрс бичлэгт Сирийн сөрөг хүчнийхэнд үзүүлж буй Америкийн тусламжийг үр ашиггүй гэж нэрлээд, босогчидтой тэмцэхийн тулд Иракийн армийг бэлтгэхэд олон сарын хугацаа зарцуулна гэж мэдэгдсэн тухай “Daily Mail” сонинд бичсэн байна.